Héraðssambandið Skarphéðinn

31. mars 2026

Guðmundur Karl sæmdur silfurmerki HSK

Á héraðsþinginu á Borg 2026 var Guðmundur Karl Sigurdórsson, fjölmiðlamaður og fyrrum formaður Knattspyrnufélags Árborgar sæmdur silfurmerki HSK.

Guðmundur Karl hefur um árabil tekið þátt í störfum íþrótta- og ungmennafélags-hreyfingarinnar. Hann hefur séð um umbrot á ársskýrslu HSK frá árinu 2003 og af slíkum myndarskap að eftir hefur verið tekið. Hann átti um árabil sæti í valnefnd HSK, en sú nefnd sér um að velja íþróttakarl og íþróttakonu HSK.

Guðmundur Karl var einn af aðalhvatamönnum að stofnun Knattspyrnufélags Árborgar árið 2000 og var á stofnfundi kosinn fyrsti formaður félagsins og gengdi því embæti í átta ár af myndarskap. Hann hefur síðan lengst af verið einn af helstu bakhjörlum og driffjöðrum félagsins.

Guðmundur Karl hefur um áratugaskeið starfað við blaðamennsku og undanfarin ár hefur hann fært okkur fréttir af miðli sínum sunnlenska.is. Þar birtast nær daglega fréttir af sunnlensku íþróttafólki, viðburðum og fundum, sem er ómetanlegt fyrir íþróttahreyfinguna í héraði. Hann hefur einnig komið að útgáfumálum fyrir Umf. Selfoss og Knatttspyrnufélag Árborgar.

Deila

Tilbaka