Héraðssambandið Skarphéðinn

27. mars 2026

Héraðsþing HSK haldið á Borg á viðvörunardegi

104. héraðsþing HSK var haldið í Félagsheimilinu Borg í Grímsnesi í gær, fimmtudag. Dagurinn var misviðrasamur, en sem betur fer gekk lægðin fljótt yfir sambandssvæðið og allar veðurviðvaranir féllu úr gildi eftir hádegi og því ekkert til fyrirstöðu að halda þingið

Um 120 manns mættu á þingið, sem nú var haldið í fimmta sinn á Borg.

Líkt og undanfarin ár voru þinggögn, önnur en ársskýrsla HSK, ekki á borðum þingfulltrúa. Þau eru öll aðgengileg á heimasíðu HSK á vefslóðinni www.hsk.is. Þar er bláleitur hnappur sem vísar á héraðsþingsgögnin.

Þingið hófst með ávarpi Guðríðar Aadnegard formanns HSK. Ávarpið má sjá í heild sinni á www.hsk.is, undir liðnum aðsendar greinar. Þá voru ársreikningar lagðir fram og samþykktir. Stjórn HSK lagði fram 13 tillögur á þinginu og voru þær allar samþykktar.

Breyting varð á stjórn sambandsins, en Jón Þröstur Jóhannesson meðstjórnandi gaf ekki kost á sér til endurkjörs. Guðrún Ása Kristleifsdóttir, sem hefur átt sæti í varastjórn frá 2024, var kosin í stjórn. Ágústa Kristín Hjaltadóttir fyrrverandi formaður Íþróttafélagsins Garps kemur ný inn í varastjórn.

Val á íþróttakonu og íþróttakarli HSK 2025 var kunngjört á þinginu. Golfarinn Heiðrún Anna Hlynsdóttir og motocrosskappinn Eric Máni Guðmundsson voru valin úr hópi þeirra sem tilnefndir voru úr fjölmörgum greinum sem stundaðar eru hjá aðildarfélögum HSK.

Hvatningarverðlaun HSK voru nú veitt í annað sinn. Stjórn ákvað að horfa til verkefna aðildarfélaga sambandsins sem nefnd eru í ársskýrslum félaga, sem borist höfðu fyrir tilskilinn frest. Það var Ungmennafélag Biskupstungna sem hlaut þessi verðlaun fyrir fyrir öflugt félagsstarf og nýbreytni.

HSK heiðraði tvo einstaklinga á héraðsþinginu. Svanur Ingvarsson á Selfossi var valinn öðlingur ársins og Guðmundur Karl Sigurdórsson fjölmiðlamaður og fyrrverandi formaður Knattspyrnufélags Árborgar var sæmdur silfurmerki HSK.

Ungmennafélag Íslands heiðraði fjóra einstaklinga úr Grímsnes- og Grafningshreppi. Lísa Thomsen var sæmd gullmerki UMFÍ og Guðrún Ása Kristleifsdóttir, Kjartan Helgason og Hörður Óli Guðmundsson voru sæmd starfsmerki UMFÍ.

Íþrótta- og Ólympíusambands Íslands heiðraði þau Anný Ingimarsdóttir ritara stjórnar HSK og Gylfa Þorkelsson, fyrrverandi formann Körfuknattleiksfélags Selfoss, með gullmerki ÍSÍ.

Deila

Tilbaka