Héraðssambandið Skarphéðinn

14. nóvember 2025

Áframhaldandi stuðningur við Allir með

Á Allir með leikunum sem fram fóru í Laugardalshöllini sl. laugardag var greint frá því að ríkisvaldið væri búið að ákveða að styrkja áfram verkefnið Allir með. Veittar verða 60 milljónir króna til að auka þátttöku og virkni fatlaðs fólks í íþróttastarfi, einkum fatlaðra barna og ungmenna. Verkefnið er liður í að ná markmiðum 30. greinar samnings Sameinuðu þjóðanna um réttindi fatlaðs fólks sem fjallar meðal annars um þátttöku fatlaðs fólks í íþróttum.

Um er að ræða áframhald á verkefninu „Allir með“ sem hófst árið 2022 undir merkjunum „Farsælt samfélag fyrir öll – brúum bilið“. Ábyrgð þess er á höndum Íþróttasambands fatlaðra sem vinnur það í samstarfi við Íþrótta- og Ólympíusamband Íslands og Ungmennafélag Íslands. Bakhjarlar verkefnisins eru ráðuneytin þrjú, ÖBÍ réttindasamtök og Landssamtökin Þroskahjálp. 

Inga Sæland, félags- og húsnæðismálaráðherra, Alma Möller heilbrigðisráðherra og Guðmundur Ingi Kristinsson, mennta- og barnamálaráðherra mættu á leikana og tilkynntu um styrkinn. Fjöldi fatlaðra barna mættu á leikana og tók þátt í fjölbreyttum íþróttum, svo sem handbolta, körfubolta, fimleikum, frjálsum íþróttum, badminton, keilu, pílu, klifri og jassballet.

Deila

Tilbaka