Héraðssambandið Skarphéðinn

18. nóvember 2024

Íslandsmet og HSK met sett á Silfurleikum

78 keppendur keppendur af sambandssvæði HSK voru skráðir á Silfurleika ÍR sem haldnir voru í Laugardalshöllinni sl. laugardag. Þeir komu frá fimm aðildarfélögum HSK og voru allir 17 ára og yngri.

Keppendur okkar settu tvö Íslandsmet og sex HSK met á mótinu. Anna Metta Óskarsdóttir, Umf. Selfoss, setti Íslandsmet í tveimur aldursflokkum í þrístökki, en hún stökk lengst 11,46 m sem er Íslandsmet bæði í flokki 14 og 15 ára. Stökkið er jafnframt héraðsmet í fjórum aldursflokkum. Anna Metta átti sjálf héraðsmetið í 14 og 15 ára flokkunum, 11,24 m, en í 16-17 ára flokknum bætti hún 25 ára gamalt met Ágústu Tryggvadóttur, sem var 11,38 m og í 18-19 ára flokknum bætti hún 21 árs gamalt met Bryndísar Evu Óskarsdóttur, sem var 11,43 m.

Þá tvíbætti Hjálmar Vilhelm Rúnarsson, Umf. Selfoss, HSK-metið í kúluvarpi í flokki 16-17 ára. Hjálmar Vilhelm stórbætti þar met Arnar Davíðssonar, Umf. Selfoss, en hann kastaði fyrst 14,51 m og átti síðan glæsilegt kast upp á 15,18 m en eldra met Arnar var 14,35 m.

Heildarúrslit mótsins má sjá á www.fri.is.

Mynd: Anna Metta setti Íslandsmet í þrístökki í tveimur aldursflokkum.

Deila

Tilbaka