Héraðssambandið Skarphéðinn

9. september 2024

Ólympíufari þakkar fyrir stuðninginn

Sem kunnugt er tók Hákon Þór Svavarsson frá Skotíþróttafélagi Suðurlands þátt í haglabyssuskotfimi á Ólympíuleikunum í París í sumar og stóð sig með miklum sóma.

Í apríl sl. ákvað stjórn Verkefnasjóðs HSK að veita Hákoni styrk úr sjóðnum vegna þess frábæra árangurs að hafa verið valinn í Ólympíuhóp ÍSÍ. Á þeim tíma áttu 13 íþróttamenn sæti í hópnum, en þeir áttu allir raunhæfa möguleika á að tryggja sér keppnisrétt á Ólympíuleikunum í ár. Stjórn sjóðsins ákvað af þessu tilefni að veita honum 120.000 kr. afreksstyrk úr sjóðnum, en í 9. grein reglugerðar sjóðsins segir: „Stjórn sjóðsins er heimilt að veita styrki úr sjóðnum vegna framúrskarandi árangurs einstaklinga og liða, án þess að umsókn hafi borist.“

Hákon Þór kom við á skrifstofu HSK fyrir helgina til að þakka fyrir styrkinn frá HSK og færði sambandinu að gjöf áletraða mynd af keppendum Íslands á leikunum og derhúfa með merki leikana.

Vel gert Hákon og vonandi verður hann á meðal þátttakenda á næstu Ólympíuleikum sem haldnir verða í Los Angeles 2028.

Mynd: Hákon Þór Ólympíufari og Engilbert framkvæmdastjóri HSK.

Deila

Tilbaka