Héraðssambandið Skarphéðinn

28. september 2023

HSK sækir um Landsmót UMFÍ 50+ árið 2025

Héraðssambandið Skarphéðinn hefur ákveðið að sækja um að taka að sér framkvæmd Landsmóts 50+ árið 2025 og halda mótið á Hellu. Þetta er í annað sinn sem HSK sækir um að halda 50+ mótið á Hellu, en sótt var um 2021 mótið á sínum tíma. HSK hefur einu sinni haldið Landsmót 50+, en það var í Hveragerði árið 2017.

Stjórn Umf. Heklu óskaði eftir því við Héraðssambandið Skarphéðinn í sumar að lögð verði inn umsókn þess efnis að Landsmót 50+ árið 2025 verði haldið á Hellu í Rangárþingi ytra. Stjórn HSK tók erindið fyrir á fundi 28. ágúst og ákveðið var að halda fund með félaginu og fulltrúum sveitarfélagsins og var sá fundur haldinn 25. september sl.

Strax að loknum þeim fundi samþykkti stjórn HSK að sækja um mótið 2025. Byggðarráð Rangárþings ytra samþykkti svo á fundi 27. september sl. að standa að umsókn með HSK.

Umsókn verður send til UMFÍ á morgun föstudag, en umsóknarfrestur er til 1. október.

Gera má ráð fyrir að UMFÍ tilkynni svo mótsstað öðru hvoru megin við næstu áramót.

Mynd: Frá keppni á Landsmóti 50+ í sumar.

Deila

Tilbaka