Héraðssambandið Skarphéðinn

15. júní 2011

Landsmót UMFÍ 50+ á Hvammstanga

Helgina 24 -26. júní n.k. verður á Hvammstanga haldið Landsmót UMFÍ 50+. Að mótinu standa Ungmennafélag Íslands og USVH í samstarfi við Sveitarfélagið Húnaþing vestra. Samstarfsaðilar eru Félag áhugamanna um íþróttir aldraðra og Landssamband eldri borgara.

Mótið er fyrir eldra íþróttafólk sem vill sanna að það séu ekki dautt úr öllum æðum. Keppt verður í fjölmörgum íþróttagreinum og ættu flestir að geta fundið eitthvað við sitt hæfi. Mótið er opið öllum, konum og körlum sem eru 50 ára eða eldri. Öllum er boðið til mótsins án sérstakrar félagsaðildar í íþrótta eða ungmennafélögum, en flestir munu væntanlega kenna þátttöku sína við uppáhaldsfélag sitt, jafnvel félag eldri borgara á viðkomandi stað ef annað er ekki nærtækara. Vænt þætti okkur hjá HSK um að sem flest íþróttafólk okkar sem dreifst hefur víða um kæmi til baka og keppti undir merki HSK.

Ungmennafélög, héraðssambönd og félög eldri borgara hvetja sem flesta að koma og keppa á mótinu, en að öðru leyti er keppnin ekki á þeirra vegum. Þeir einstaklingar sem hafa áhuga á að keppa á mótinu geta farið inn á vefsíðu UMFÍ, www.umfi.is. Þar er skráningarform og aðrar nauðsynlegar upplýsingar.

Mikil vakning hefur orðið í heilsurækt, ekki síst á meðal aldraðra sem hafa komist að því að holl hreyfing er heilsubrunnur sem bætir líðan og þrek, og talið er að reglubundin hreyfing og iðkun íþrótta geti lengt lífið með betri heilsu.

Þessu greinarkorni er fyrst og fremst ætlað að vekja áhuga eldra íþróttafólks á mótinu og að skora á þau að mæta þar sem flest til að mótið geti sannað að eldra íþróttafólk heldur enn tryggð við íþrótt sína. Sýna með þátttöku að þau séu tilbún að taka sjálf þátt í mótinu og vonandi hvetja aðra. Það er enginn svo gamall að hann geti ekki stundað íþróttir af einhverju tagi, sem betur fer er heilsa flestra dágóð og þótt eitthvað ami að er samt hægt að vera með í íþróttum. Ég bendi sérstaklega á að þau sem keppa í frjálsum íþróttum eða sundi keppa við jafningja, en þar er keppt í fimm ára aldurslokkum frá 50 ára og kanski upp í 100 ára ef áhugi er fyrir hendi. En aðalatriðið er ekki endilega að vinna til verðlauna, heldur að vera með í heilbrigðum og góðum félagsskap og að gera mótið sem glæsilegast.

Nýlega var sett á laggirnar nefnd hjá Héraðssambandinu Skarphéðni sem ber heitið Íþróttanefnd eldri félagsmanna HSK. Þau sem tóku sæti í nefndinni eru Tómas Jónsson Umf. Selfoss, sem var kjörinn formaður, Markús Ívarsson Umf. Samhygð varaformaður og Ingibjörg Marmundsdóttir ritari. Við hvetjum alla þá sem vilja vita meira um þetta landsmót að hafa samband við okkur, eða formenn félaga eldri borgara hver á sínum stað. Tómas er með síma 891-7364, netfang tomjons@simnet.is, Ingibjörg er með síma 897-8231, netfang unnugga@simnet.is og Markús er með síma 695-9263.

Tómas Jónsson formaður íþróttanefndar eldri félagsmanna HSK