Héraðssambandið Skarphéðinn

12. nóvember 2010

Um fimmtíu þátttakendur í fyrstu samæfingabúðum vetrarins

Fyrstu samæfingabúðir HSK í frjálsíþróttum á nýju æfinga- og keppnistímabili, fóru fram á Laugarvatni helgina 5. ? 6. nóvember s.l. og tókust mjög vel. Það var mjög góð þátttaka eða 40 krakkar og unglingar frá sjö félögum.

Um 10 manns voru svo á kast- og stökkæfingu fyrir fullorðna á laugardeginum sem Sigurður Einarsson stýrði. Mæting var kl. 16:00 á föstudeginum. Fyrri æfingin var frá kl. 16:30 - 18:30 í íþróttahúsinu þar sem meginþemað var undirbúningsæfingar fyrir hinar ýmsu greinar í stöðvaformi. Gekk það mjög vel og látið vel af því. Boðið var upp á sund frá 18:30 ? 19:00. Matur var svo framreiddur kl. 19:30 í Grunnskólanum; pylsupartý að hætti Margrétar Egils. ofl. Síðan var kvöldvaka í formi spilakvölds þar sem spilað var félagsvist á 10 borðum. Var það góð tilbreyting frá hefbundnu kvöldvökuskipulagi. Svo var bara létt spjall sem eftir lifði kvölds. Góð stemning var í hópnum. Um miðnætti var komin ró.

Þjálfarar sem voru í búðunum voru: Ólafur Guðm., Margrét Egils, Inga María, Heimir, Þurý, Ágústa Tr.,Dagur Fannar og Halli Einars. Siggi Einars var svo með eldri kast- og sprintæfingu á laugardeginum.

Daginn eftir var æfing frá 10:30 - 13:00 þar sem viðfangsefnið var liðakeppni. Skipt var í 7 blönduð aldurslið þar sem keppt var í 7 mismundandi greinum. Þetta gekk mjög vel og góð æfing fyrir fyrsta mót vetrarins sem eru Silfurleikar ÍR 20. nóvember. Kl. 13:10 fóru allir til síns heima ánægðir með góða helgi.