Héraðssambandið Skarphéðinn

20. september 2014

Hver er þín uppáhalds hreyfing? -hver er þín hreyfing?

Það er talið að um 600.000 þúsund dauðsfalla í Evrópu megi rekja beint til hreyfingarleysis. Flestir sem hreyfa sig ekki neitt segja ástæðuna vera peningaskort. Það er margt hægt að gera til að bæta heilsu sína sem hvorki kostar krónu né mikla fyrirhöfn. Mestu máli skiptir að hafa gaman af því sem maður tekur sér fyrir hendur, því það eykur líkurnar á því að maður haldi áfram.

Það eru skilaboðin í samfélaginu og boðskapurinn sem skiptir máli. Frá því að við vöknum á morgnana og förum að sofa á kvöldin þá erum við að hreyfa okkur en við þurfum að fá hjartað til að pumpa duglega að minnsta kosti í 30 mínútur á dag til að endurnýja frumurnar okkar og þannig bæta heilsuna. Það þurfa ekki allir að stunda fjallgöngur, æfa íþróttir, hlaupa maraþon, vera í skokkhóp eða taka þátt í þrekmótum. Það ættu allir að finna sína hreyfingu – eitthvað sem hentar hverjum og einum og hafa gaman af því. Alltof margir velja að verma sófann í stað þess að uppfylla ráðlagðan dagsskammt af hreyfingu á dag.

Hvernig fáum við fleiri til að stunda hreyfingu sér til heilsubótar? Allsstaðar í heiminum er fólk að reyna að finna töfralausnina og Hreyfivikan MOVE WEEK sem fer fram um gjörvalla Evrópu dagana 29. september – 5. október 2014 líka – en bara aðeins öðruvísi!

Hreyfivikan MOVE WEEK er hluti af “The NowWeMove 2012 - 2020” herferð International Sport and Culture Association (ISCA) sem hefur það að markmiði að kynna kosti þess að taka virkan þátt í hreyfingu og íþróttum til heilsubótar. Ungmennafélag Íslands (UMFÍ) er aðili að ISCA og tekur þátt í verkefnum samtakanna.

Á sambandssvæði HSK munu nokkur sveitarfélög standa fyrir dagskrá í Hreyfivikunnu MOVE WEEK en Árborg, Hveragerði og Þorlákshöfn verða með glæsilega dagskrá. Síðan er aldrei að vita hvað einstaklingsframtakið kemur til með skila sér því það geta allir sem vilja tekið þátt. Ef þú hefur áhuga á að gerast boðberi hreyfingar á Íslandi þá getur þú skráð þig inni á heimasíðu herferðarinnar www.iceland.moveweek.eu, staðið fyrir viðburð og hvatt fólk til að taka þátt með þér. Saman getum við öll gert frábæra hluti og spornað gegn hreyfingarleysi.

Sabína Steinunn Halldórsdóttir, landsfulltrúi UMFÍ