Héraðssambandið Skarphéðinn

Erindisbréf fyrir nefndir HSK

1. grein

Héraðsþing skal árlega kjósa í starfsnefndir HSK sem annist ýmis mál sem héraðsþing og stjórn kann að fela þeim. Héraðsþing ákveður hverju sinni fjölda aðal- og varamanna í þeim nefndum sem kosnar eru á þingi. Tala nefndarmanna skal standa á stöku og formaður tilnefndur sérstaklega á héraðsþingi. Þá er stjórn HSK heimilt að kjósa í starfsnefndir vegna ákveðina verkefna á vegum HSK. Þar sem sérráð eru starfandi, samanber 8. kafla laga ÍSÍ, hefur viðkomandi ráð yfirumsjón með íþróttamálum innan héraðs í viðkomandi grein.

2. grein

Nefndir skulu starfa í nánu samstarfi við stjórn og framkvæmdastjóra sambandsins og vinna að þeim verkefnum sem stjórn og héraðsþing hefur falið þeim. Sérráð verða að skila ársuppgjöri og fjárhagsáætlun til stjórnar HSK.

3. grein

Nefndir og ráð skulu sjá um framkvæmd héraðsmóta. Nefndum og ráðum er einnig heimilt, sbr. 5. grein reglugerðar um héraðsmót, að semja um að aðildarfélög HSK taki að sér framkvæmd héraðsmóta. Nefndir og ráð skulu sjá um undirbúning og þátttöku í viðkomandi grein á Landsmótum UMFÍ. Þær skulu sjá um að örugg forysta og fararstjórn sé jafnan með hverjum hópi á Landsmótum. Ákveði félög að senda sameiginlegt lið til keppni á önnur mót á landsvísu undir merkjum HSK skulu nefndir sjá um undirbúning, þátttöku og fararstjórn í samráði við viðkomandi félög. Þar sem ráð eru starfandi ákveður aðalfundur ráða hvernig þessum málum skuli háttað.

4. grein

Nefndir skulu í samstarfi við stjórn og framkvæmdastjóra HSK ákveða þátttökugjöld á héraðsmótum HSK. Þar sem ráð eru starfandi skulu þátttökugjöld ákveðin á aðalfundi viðkomandi ráðs. Þátttökugjöld skulu taka mið af kostnaði vegna mótshaldsins. Þátttökugjöld skulu innheimt áður en mót hefst, þó er heimilt að fela skrifstofu HSK innheimtu á gjöldunum. Stjórn HSK er heimilt að draga þátttökugjöld frá lottógreiðslum félaga.

5. grein

Nefndir og ráð skulu sjá um að séu fyrir hendi farandverðlaunagripir á héraðsmótum og skrá inn verðlaunahafa hverju sinni í þar til gerða bók sem er í þjónustumiðstöð HSK, samanber reglugerð fyrir farandverðlaunagripi HSK. Þó skulu nefndir aðeins kaupa verðalaunagripi með samþykki stjórnar HSK. Heimilt er að víkja frá þessari reglu og veita þess í stað eignarbikara. Nefndir skulu sjá til þess að verðlaunapeningar séu veittir fyrir þrjú fyrstu sætin í öllum flokkum á héraðsmótum HSK. Nefndum og ráðum er þó heimilt að falla frá þessari reglu, ef þátttökufélög óska þess. Í flokkum 10 ára og yngri skulu allir þátttakendur fá jafna viðurkenningu.

6. grein

Nefndir og ráð skulu taka saman úrslit einstakra móta og leikja strax að mótum loknum og sjá til þess í samráði við stjórn/framkvæmdastjóra HSK, að þau birtist fljótlega í fjölmiðlum og á heimasíðu HSK.

7. grein

Nefndir og ráð skulu í lok starfsárs velja íþróttamann HSK í viðkomandi grein, samanber reglugerð um kjör íþróttamanns HSK. Þá skulu nefndir og ráð taka saman starfsskýrslu, sem skilist til stjórnar HSK fyrir 1. febrúar ár hvert. Skýrslan eða úrdráttur úr henni verður birt í ársskýrslu HSK.

8. grein

Nefndum er óheimilt að stofna til fjárskuldbindinga í sínu nafni eða nafni HSK.

9. grein

Með erindisbréfi þessu eru allar aðrar reglur um nefndir HSK úr gildi fallnar.

(Síðast breytt á héraðsþingi HSK 2017)

Tilbaka