Héraðssambandið Skarphéðinn

15. mars 2017

Kjartan öðlingur ársins hjá HSK

Kjartan Lárusson, Umf. Laugdæla HSK var útnefndur öðlingur ársins hjá HSK árið 2016 og var útnefningin kunngjörð á héraðsþinginu sl. laugardag. Bikarinn fyrir öðling ársins er veittur einstaklingum sem hafa keppt og iðkað íþróttir og heilsurækt í áratugi og/eða hafa starfað að félagsmálum í hreyfingunni og eru enn að.

Kjartan hóf feril sinn í körfuknattleik 1970 og hefur keppt á um 20 héraðsmótum, landsmótum UMFÍ og á Íslandsmótum í körfuknattleik og varð m.a. Íslandsmeistari í 3. deild 1976. Kjartan keppti fyrst í blaki á fyrsta héraðsmótinu 1974 og er en að keppa í því. Hann hefur keppt á mörgum Íslandsmótum og varð m.a. Íslandsmeistari í blaki í efstu deild 1979 og 1980 og bikarmeistari 1980. Þá varð hann landsmótsmeistari í blaki á Selfossi 1978. Kjartan hefur auk þess orðið Íslandsmeistari í sveitaglímu, varð bikarmeistari í glímu 2001 og hefur unnið til verðlauna í Íslandsglímu og á Íslandsmeistaramóti og var skjaldarhafi Skarphéðins 1986 og 1987. Kjartan hefur einnig æft og keppt á héraðsmótum í frjálsum íþróttum, handknattleik, knattspyrnu, borðtennis, dráttavélaakstri og hrossadómum. Hann hefur keppt á um 85 héraðsmótum. Síðustu ár hefur hann keppt á Landsmóti UMFÍ 50+ m.a. í frjálsum íþróttum, sauðfjárdómum, blaki og ringó, og unnið til verðlauna í öllum greinum.

Deila

Tilbaka